સંગીતકાર તરીકે એ આર રહેમાનની આ પહેલી હિન્દી ફિલ્મ. અહીં રહેમાને સહેજ જુદી રીતે ગાયકો પસંદ કર્યા છે. બોલિવૂડના અને પોતાના સાઉથના ચાહકો નારાજ ન થાય એ રીતે ગાયકોની પસંદગી કરી છે. અહીં આદિત્ય અને ઉદિત નારાયણ સાથે આશા ભોંસલે છે તો બીજી બાજુ હરિહરન, ચિત્રા, શ્વેતા શેટ્ટી અને રહેમાન પોતે છે. બધાં ગીતો હિટ નીવડ્યાં હતાં અને યુવાન ચાહકો રીતસર ઘેલા થયા હતા.
હાય રામ યે ક્યા હુઆ ક્યૂં હમેં સતાને લગે... ગીતનો વિદેશી કહેરવો કાનમાં વાગે છે. એને કારણે એક પ્રકારની એકવિધતા (મોનોટોની) સંગીતમાં આવી જાય છે. દિવાળીમાં તડાફડીની લૂમ ફૂટતી હોય એવો ધડાકેદાર કહેરવો અહીં છે. જો કે ગીતને જમાવવા હરિહરન અને સ્વર્ણલતાએ સારી મહેનત કરી છે.
ક્યા કરે ક્યા ના કરે, યે કૈસી મુશ્કિલ હૈ, કોઇ તો બતા દે ઇસકા હાલ ઓ મેરે ભાઇ... આદિત્યના કંઠમાં છે. રાગ ભીમપલાસીનો આધાર લઇને આ ગીતની તર્જ પાશ્ચાત્ય ઢબના દાદરા તાલમાં સરસ બની છે.
પ્યાર યે જાને કૈસા, ક્યા કહેં યે કુછ ઐસા હૈ, કભી દર્દ યે દેતા હૈ, કભી ચૈન યે દેતા હૈ... ફરી એકવાર આદિત્ય નારાયણ અને આશા ભોસલેના કંઠમાં મજેદાર રોમાન્ટિક રચના છે.
છેલ્લું ગીત આઇ આઇ યો, મંગતા હૈ ક્યા, દિલ કો વો તો બોલો, જીના હૈ તો અપુન કે જૈસા જિયો... ગાડી બંગલા નહીં ના સહી ના, બેંક બેલેન્સ નહીં ના, સહી ના ...? જેવા શબ્દો ધરાવતા આ ગીતમાં સંપત્તિ, બંગલો, મોંઘીદાટ કાર અને બેંક બેલેન્સ હોવા છતાં માણસ સુખી નથી હોતો એવી ફિલસૂફી સરળ શબ્દોમાં રજૂ થઇ છે. અસ્સલ બમ્બૈયા ટપોરી ટાઇપના શબ્દોથી ગીત સજેલું છે.
કથા, કલાકારોનો અભિનય, છબીકલા, ગીતો અને સંગીત બધી રીતે ફિલ્મ સુપરહિટ નીવડી હતી. માત્ર સાડા ચાર કરોડ રૂપિયામાં રામ ગોપાલ વર્માએ બનાવેલી આ ફિલ્મે બોક્સ ઓફિસ પર આશરે સાડા તેત્રીસ કરોડનો બિઝનેસ કર્યો હતો. ગીતો સતત ગવાતાં રહ્યાં હતાં. રિધમ એકસરખી હોવાની સૌથી મોટી મર્યાદા છતાં રહેમાનના સંગીતે ધમાલ મચાવી દીધી હતી એ હકીકત સ્વીકારવી રહી.
Comments
Post a Comment